Спэцслужбы дапыталі...
23.07.2008 15:33
Дырэктарку выдавецкага дома “Витебский курьер” Жану Папову, сябраў БСДП “Грамада" Віктара Сазонава, актывіста АГПі Аляксандра Сьцепаненку, актывіста БСДП(Грамада) Вячаслава Болбата. ...
Сёньня ў Віцебску супрацоўнікі міліцыі правялі ператрус у кватэры дырэктаркі выдавецкага дома “Витебский курьер” Жаны Паповай.
Як паведамляе БАЖ, ператрус праводзілі міліцыянты з Мінску, супрацоўнікі Ўпраўленьня па барацьбе з арганізаванай злачыннасьцю. Яны патлумачылі, што ператрус у кватэры журналісткі ладзіўся ў сувязі з выбухам 4 ліпеня ў Менску. Адразу пасьля ператрусу міліцыянты павезлі Жану Папову ў Абласное ўпраўленьне міліцыі па барацьбе з арганізаванай злачыннасьцю для дачы паказаньняў.Выдавецкі дом “Витебский курьер” выпускае адзіную на сёньня ў горадзе зарэгістраваную недзяржаўную грамадзка-палітычную газэту “Витебский курьер М”.
***
У Горадні ў КДБ сёньня дапыталі Віктара Сазонава. У сябра БСДП “Грамада” пыталіся, ці вучылі яго падчас вайсковай службы абыходзіцца з выбуховымі рэчывамі. Службу Віктар Сазонаў праходзіў у дэсантных войсках. Запыталіся таксама, дзе быў з 3 на 4 ліпеня. Ён адказаў, што ў гэты час знаходзіўся дома.
***
Сёньня супрацоўнікі Камітэту дзяржаўнай бясьпекі правялі ператрус у Менску ў кватэры актывіста Аб'яднанай грамадзянскай партыі Аляксандра Сьцепаненкі. Пасьля ператрусу а 14-й гадзіне Аляксандра Сьцепаненку павезьлі на допыт у КДБ.
***
Сёньня ў міліцыю Баранавічаў выклікалі актывіста Беларускай сацыял-дэмакратычнай партыі (Грамада) Вячаслава Болбата. “У мяне ўзялі адбіткі пальцаў, далоняў, сьліну на аналіз, завялі картку – распавёў “Свабодзе” спадар Болбат. - Мне сказалі, што шукаюць людзей, датычных да выбуху ў Менску. Цікавіліся, дзе я знаходзіўся 3 і 4 ліпеня”. Апазыцыйны актывіст сказаў, што ў міліцыю выклікалі таксама і іншых мясцовых актывістаў - Віктара Мезяка з БНФ, Віктара Цяпіна з Партыі камуністаў беларускай і праваабаронцу Сяргея Гоўшу.
***
Лідэра незарэгістраванай Беларускай партыі Свабода Сяржука Высоцкага выклікаюць у Сьледчае ўпраўленьне па вуліцы Сапёраў. Сяржук Высоцкі паведаміў Свабодзе, што яму патэлефанавалі і папрасілі прыйсьці без адваката. Яму паабяцалі, што сустрэча будзе доўжыцца 10-15 хвілін. Супрацоўнікі ўпраўленьня не патлумачылі прычыну выкліку да сьледчага. Сяржук Высоцкі быў затрыманы як падазраваны ў справе выбуху 4 ліпеня і 72 гадзіны правёў у сьледчым ізалятары КДБ. Супрацоўнікі КДБ адпусьцілі яго пасьля допыту.
У раскрыцьці выбуху 4 ліпеня Беларусь супрацоўнічае з Інтэрполам. Пра гэта заявіў сёньня міністар унутраных спраў Уладзімер Навумаў, адказваючы на пытаньні журналістаў ў Гомелі. «Бліжэйшым часам у СМІ зьявяцца фотаздымкі падазраваных, і грамадзян папросяць зьвярнуцца ў праваахоўныя ворганы, калі яны некага апазнаюць», – цытуе БелаПАН словы міністра.
Сярод прычынаў, якія тармозяць раскрыцьцё злачынства Навумаў назваў стабілізацыю ў грамадзтве, з-за якой міліцыя «крыху страціла тую пільнасьць, якая неабходная супрацоўнікам», а таксама «нярвовасьць і сьпешку» ў працы сьледзтва, якое разумее, што «злачынства трэба раскрыць у максымальна сьціслы тэрмін».