“Be2gether” пачаўся, нягледзячы на лівень
15.08.2008 20:04
Сёньня непадалёк ад беларуска-літоўскай мяжы ў Нарвілішках адкрыўся міжнародны музычны фэстываль “Be2gether” – “Быць разам”.
Наша карэспандэнтка перадае зь месца правядзеньня фэстывалю:
“Я сёньня ехала ў Вільню цягніком, і ён быў поўны моладзі, якая накіроўвалася на фэст. Памежнікі вельмі прыязна ставіліся да нас: “А, вы на сьвята...”
У Вільні з раніцы было цудоўнае сонечнае надвор’е, паўсюль мы бачылі рэкляму фэстывалю. Але літаральна за гадзіну да адкрыцьця фэсту пайшоў дождж, і тут зараз лівень.
Фэст пачынаецца з канцэрту гурту NRM на самай галоўнай сцэне. Прымаюць іх вельмі добра, атмасфэра вельмі прыязная. Народ пакуль грэецца, танчыць... Лявон Вольскі пачаў канцэрт бадзёра, сказаўшы, што ў Беларусі благога надвор’я не бывае...
Нягледзячы на дождж, народу вельмі шмат. Я налічыла 12 бел-чырвона-белых сьцягоў.
Я была на фэстывалі ў мінулым годзе, і, шчыра кажучы, гэтае поле сёньня не пазнала – вельмі шмат скульптур, намётавы гарадок большы, чым летась, лунаюць бел-чырвона-белыя сьцягі – думаю, беларусаў тут шмат.
Цікавасьць да фэстывалю сёлета вялікая. Па дарозе да Нарвілішак корак быў такі, што прыйшлося ісьці пешшу 3 кілямэтры, і нават дыпляматычныя машыны з грузінскім сьцягам стаялі ў чарзе – столькі машын ехала на фэст”.
Няма камэнтароў. Дадайце свой і будзьце першы