А.Сурыкаў прадказвае Паўднёвай Асэтыі і Абхазіі лёс Косава
21.08.2008 13:09
“Мы думаем, што беларускі бок будзе прытрымлівацца прыкладна той самай пазыцыі, што і Расея, у канфлікце, які адбываўся ў Паўднёвай Асэтыі і Абхазіі”, — заявіў расейскі амбасадар Аляксандар Сурыкаў.
Дыплямат нагадаў на прэсавай канфэрэнцыі, што 20 жніўня Аляксандар Лукашэнка сустракаўся з кіраўнікамі непрызнаных рэспублік Эдуардам Какойты і Сяргеем Багапшам.
“Гаворка пра існаваньне гэтых рэспублік у складзе Грузіі “цяпер адкінутая вельмі надоўга вельмі непрадуманнымі рашэньнямі Грузіі”, — заявіў амбасадар.
“Як на гэта адкажа Расея? Сказаць вельмі і вельмі цяжка. Для гэтага патрэбны час. Патрэбна разьвязаць рашэньне з дапамогай міжнародных структураў”, — заявіў спадар Сурыкаў.
Прадстаўнік Расеі падкрэсьліў, што ягоная краіна пакуль ”ні слова не сказала, што яна дэ-юрэ не прызнае цэласнасьць Грузіі”. Ён патлумачыў: “Гэта адпавядае аднаму з шасьці пунктаў дамовы Сарказі-Мядзьведзева”.
“Калі абвастрэньне дойдзе да выключнай сытуацыі, нельга ня браць у разьлік, што з Паўднёвай Асэтыяй і Абхазіяй можа адбыцца тое самае, што і з Косава”, — выказаў сваё меркаваньне амбасадар Расеі ў Беларусі Аляксандар Сурыкаў.
Няма камэнтароў. Дадайце свой і будзьце першы