Жыцьцё і сьмерць мітаў -- новая “Атлянтыда”
03.09.2008 14:35
У чацьвер 4 верасьня на хвалях Радыё Свабода адбудзецца прэм’ера новага цыклю “Беларускай Атлянтыды”. Аўтар і вядучы праграмы Вячаслаў Ракіцкі расказвае.
У гэтым цыкле я запрашаю беларускіх інтэлектуалаў да размовы пра беларускую міталёгію нашага часу.
У 21-е стагодзьдзе, у новую гістарычную рэалію сувэрэннай краіны, беларусы ўвайшлі з ношай усьведамленьняў стагодзьдзя мінулага, гістарычнай рэаліі калянізаванай і камуністычнай Беларусі. Многія паняцьці, ідэі набылі характар міталягемаў і ідэалягемаў. Яны надоўга замацаваліся ў сьвядомасьці людзей, вызначалі і вызначаюць іх сьветабачаньне, псыхалёгію, дзеяньні як прыватнага, так і грамадзкага, нават палітычнага характару.
Калі, зь якіх гістарычных рэаліяў нараджаліся міты? Як яны функцыянавалі і выкарыстоўваліся працяглы час? Станоўча ці адмоўна ўплывалі на хаду гісторыі нацыі? Пры якіх умовах яны могуць загінуць, і хто можа стаць іх магільшчыкамі? А ў захаваньні якіх мітаў усё ж існуе гістарычная мэтазгоднасьць?
Правінцыя, Тутэйшыя, Народ, Крыўе, Балты, Зямля, Душа, Партызан, Каліноўскі, КДБ, БССР, Сталін, Вільня, Буржуй, Запаведнік -- такія міталягемы і ідэалягемы першымі патрапілі ў сьпіс беларускай міталёгіі 20 і 21 стагодзьдзяў.
Правінцыя, Тутэйшыя, Народ, Крыўе, Балты, Зямля, Душа, Партызан, Каліноўскі, КДБ, БССР, Сталін, Вільня, Буржуй, Запаведнік -- такія міталягемы і ідэалягемы першымі патрапілі ў наш сьпіс беларускай міталёгіі 20 і 21 стагодзьдзяў.
У новым цыкле “Беларускай Атлянтыды” вы пачуецеся з многімі сталымі ўдзельнікамі праграмы – філёзафамі Валянцінам Акудовічам і Тацянай Процькай, гісторыкамі Захарам Шыбекам і Алегам Трусавым, мастацтвазнаўцам Сяргеем Харэўскім. Пасьля амаль двухгадовага перапынку да ўдзелу ў перадачы вяртаюцца этнакультуроляг Тацяна Валодзіна і філёзаф Алесь Анціпенка. Будуць і новыя госьці праграмы. Ужо ў верасьні вас чакае сустрэча з этнакультуролягам Аляксеем Дзермантам. Спадзяюся на супрацоўніцтва і зь іншымі знанымі беларускамі інтэлектуаламі.
А пачынаем мы размову пра жыцьцё і сьмерць мітаў зь літаратуразнаўцам Пятром Васючэнкам перадачай “Утопія Беларусь”.