“Найгоршае, што ёсьць у Беларусі, – гэта атмасфэра страху”
24.09.2008 00:00
Чарговы грамадзкі рэдактар Свабоды – Аляксандар Дабравольскі.
Праз два месяцы ў яго паўвекавы юбілей. Мае дзьве вышэйшыя адукацыі – тэхнічную і юрыдычную. Напрыканцы савецкае эпохі быў дэпутатам Вярхоўнага Савету СССР, у складзе Міжрэгіянальнай дэпутацкай групы – першай дэмакратычнай парлямэнцкай апазыцыі ў Савецкім Саюзе – працаваў разам з Андрэем Сахаравым, Барысам Ельцыным, Васілём Быкавым, Алесем Адамовічам... У Вярхоўным Савеце Беларусі 13-га скліканьня абіраўся старшынёй падкамісіі па сродках масавай інфармацыі і сувязях з грамадзкімі аб’яднаньнямі. Сябра Палітычнай рады Аб’яднанай грамадзянскай партыі, дырэктар Усходнеэўрапейскай Школы палітычных дасьледаваньняў.
Сёньня Аляксандар Дабравольскі разважае пра атмасфэру страху, якая пануе ў грамадзтве.
– У выпадку, калі дасягнуўшыя ўлады людзі хочуць захаваць яе надалей, прычым незалежна ад меркаваньня выбарцаў, яны ператвараюць дзяржаву ў цалкам падкантрольную структуру. Фактычна, дзяржава імі прыватызуецца.
І надалей ідзе ўжо змаганьне не за тое, што дэкляруецца ў лёзунгах, а за іхныя канкрэтныя інтарэсы.
У гэта ўцягваецца вялікая колькасьць памагатых, на сумленьні якіх зь цягам часу ўсё больш і больш ня проста непрыгожых, а – подлых учынкаў.
Аднак я б у першую чаргу вінаваціў ня іх. Ня тых, хто можа звольніць супрацоўнікаў, чыё вальнадумства не стасуецца зь дзяржаўнай палітыкай ці зь меркаваньнем непасрэдных начальнікаў. І ня тых “стукачоў”, якія заўсёды гатовыя “закласьці” вальнадумцаў.
Я вінавачу аўтараў стварэньня такой атмасфэры ў краіне.
У выніку якой людзі баяцца адкрыта выказваць свае думкі. Яны баяцца нават сярод сяброў сказаць штосьці “такое”. Таму ўсе гэтыя гаворкі – ні пра што.
Такая атмасфэра – найгоршае, што ёсьць у Беларусі. І я толькі ўяўляю радасьць, калі мы ўсе нарэшце зможам удыхнуць свабоднае чыстае паветра.
Няма камэнтароў. Дадайце свой і будзьце першы